Bruken av slike siktemiddel har ikkje vore lovregulert tidlegare og har difor vore nytta på jakt. Blant hjortejegerane i våre område har bruken vorte utbreidd dei seinare åra, ettersom teknologien gradvis har vorte lettare tilgjengeleg og rimelegare.

I samband med den nye lova er det gjort endringar i forskrift om utøving av jakt, felling og fangst (jaktutøvingsforskrifta), som opnar for at kommunane kan fastsetje lokal forskrift om bruk av restlysforsterkande og termiske siktemiddel ved jakt på hjort i ope terreng. Føremålet med heimelen er ei meir effektiv og målretta forvaltning av hjort der dette er naudsynt for å avverje alvorleg skade på naturen eller samfunnsinteresser.

Det er utarbeidd eit utkast til lokal forskrift, i tråd med tilsvarande utkast i nabokommunane. Utkastet må leggjast ut på høyring i seks veker. Dersom formannskapet vedtek å leggje forskrifta ut på høyring, kan ho behandlast i kommunestyret 7. september 2026.