Godkjent reguleringsplan for Fiskåbygd
Kommunestyret har den 29.06. eigengodkjent reguleringsplanen for Fiskåbygd. Dette vert no kunngjort med 3 vekers klagefrist.
Med heimel i plan- og bygningslova av 1985 § 27-2, vedtok kommunestyret å eigengodkjenne reguleringsplan for Fiskåbygd den 29.06.10 – sak 31/2010.
Planområdet er i og rundt Fiskå sentrum, med Fredsvoll byggefelt og Tørlen i nord, skuleområde og gravplass i aust, Fiskåelva og sjøareal med strandsone til Låtra i sør, Fiskåholmen og sjøareal i vest, totalt ca 1200 dekar.
Planen legg grunnlag for utvikling av Fiskå som attraktiv tettstad og kommunesenter, med gode bustadområde, næringsområde, offentlege formål, vegar og friområde. Planen erstattar tidlegare planer i området.
Sjå planen her ( under kunngjeringar). Dokumenta er også lagt ut på servicetorget på rådhuset. MERK at plankartet du finn til høgre enno ikkje er oppdatert for endring vedteken i kommunestyret, når det gjeld veg forbi K/B 1 i Djuvika.
Planen vert gjeldande for alle tiltak som er nemnt i plan- og bygningslova av 1985 §§ 81, 86a, 86b, og 93 i planområdet. Det same gjeld frådeling og annan bruk som kan vanskeleggjere gjennomføring av planen.
Krav om erstatning eller innløysing må fremjast skrifteleg til kommunen innan 3 år frå kunngjeringa eller 3 år etter at byggverk er fjerna, jf. Plan- og bygningslova av 1985 § 32 nr.1 og § 42.
Vedtaket kan påklagast til fylkesmannen innan 3 veker frå denne kunngjeringa. Klagen skal vere skrifteleg og sendast til Vanylven kommune, 6143 Fiskåbygd eller på e-post til postmottak@vanylven.kommune.no .
Kontakt planleggar Randi Aarønæs ved spørsmål, tlf 70030073 eller 70030000.